Monday, August 08, 2011

नीना- २

नीना,
तू अजूनही येतेस माझ्या स्वप्नांत.
घेतेस मला गुरफटून
तुझ्या मऊ सुती पदराच्या
गंधाळलेल्या उबेत.
केसांमधून जाणवतात
तुझी सुरकुतलेली जादुई बोटं.
आणि ऐकू येत मंदमंद
तुझ्या बिनदाताच्या मुखातून
मृदुमुलायम झालेल्या स्वरांचं एक गाणं.
पहाटे कुण्या पक्षाच्या आवाजात
जे विरून जातं कुठेतरी…

सकाळी जागा होतो तेव्हा
मी रात्रभर पांघरलेल्या
तुझ्या त्याच मऊ सुती लुगड्याच्या गोधडीतून
येत असतो तुझा चंदनी गंध.

नीना, त्या चंदनखोडासारखीच तू…
कधी संपलीस… मला कळलंच नाही.


No comments: